الكاتب : محــــمد محمود الجكاني

الشاعر : الشيخ إبراهيم الزياني

نبذة تعريفية للشاعر:  الشيخ إبراهيم الزياني

هو من مواليد 1960 من نواحي تافيلالت شاعر لم يلج المدرسة قط وقد كبر في أحضان البادية وهو ينتمي إلى قبيلة ذوي منيع إحدى بطون قبائل بني هلال كانت بدايته مع الشعر سنة 1983 .

 

أغراضه الشعرية : المدح ـ الغزل ـ وصف الطبيعة ـ وطنية ـ التغني بقبيلة ذوي منيع...   .

 

عنوان القصيدة :                              التمر والنخيل بأرفود

 

ها مدينة أرفود زاهرة والمنظر جميل

والمعرض مبهج بالتمر على كل اصناف

المجهول والفكوس وها الخلط معمر لقفاف 

ونكولو للزوار مرحبا في ارض النخيل    *****   تعالوا تزورو بلادنا فيها مايتشاف

راها كاين واحات ياسرة والطريق طويل   *****   ورمالي ذهبيا الي باغي الاكتشاف

وكاين اثارات صامدة من جيل الى جيل      *****  وعادات وتقاليد باينة ما فيها خلاف 

وجواد اهل الكرم يفرحوا بيك ولاد الصيل   *****   جابو دالخصلة من جدودهم يحبو الضياف  

هذه ارض الأمان ولهنا سير حتى بالليل   *****  وتجول فيها كيبغيت ماكاين مناش تخاف 

نتمناو حنايا بلادنا ترجع كيكبيل            ***** عمرها ماتخوى ان شاء الله منبع الشرف 

نطلبوا مولانا يجيب ليها شي مزن تقيل      *****  تصبح به الويدان حاملة ترمي من الأطراف

تنعم تافيلالت كلها والمحصول يحيل        *****  تكتفي وتصدر كيف كانت تغني الضعاف 

ولي ماعرفشي يجي نعطوه التفاصيل        *****  كانوا بكري لغراس يهبطو حتى لكرناف 

افاكية الصحراء وغيرك ماكاين بديل         *****  وتعيشي يا نخلة شامخة يازينة لوصاف 

تبقى ديما خضرة هاكا تولد لين تميل         *****  يا رب تحفظها من لبلا ما يوصلها تلاف 

سمحي ليا ا لالة وما كولت عليك قليل      ***** انت مولات الخير عارفين عطيتي بزاف 

 

ديما شأنك غالي يا النخلة مهوشي هزيل    *****  بالنسبة للشاعرهذا غير اعتراف

هذ الشاعرمعاك شاهذ جميع المراحل                   *****  حضرنا وقت النعم ليك وحتى وقت الجفاف

وصبرتي في سنين قاسحة فيها مشاكل                *****  ولي ضاع يرجع ليك نحمدو مولانا خلاف

هذا منتوج بلادنا عليه نشكرو الجليل              *****  تكمل يا مولانا طريقنا تتحقق لهداف