البارح و انا سارح فالانترنيت و انا لقا واحد المقال عن التاريخ المغربي، و فيه واحد الخريطة ديال المغرب لسنة 1880 تترجع لعهد الحسن الاول. الموهيم هاد الخريطة روناتني فدماغي حيث حدود المغرب فيها من جهة الشرق كانت فايتا وجدة و واصلة لداخل ديال الجزائر، و كانت سبتة و مليلية و جبل طارق تابعا لينا، اما الصحراء المغربية فكانت كبيرة بزاف و فايتا موريتانيا لهيه.
بغيت غير نفهم واحد الحاجة الناس تيتوسعو فهاد الدنيا، و احنا علاش غادين و تنتكمشوا تولين اقزام و ممكن سنافر غير فالحجم حيث السنافر بزاف علينا و علاش احنا ديما تنسمحوا فحقنا؟
سمحنا فجزء كبير من الشرق، و سمحنا فسبتة و مليلية و جبل طارق، و سمحنا فجزء كبير من الصحرا، تالاين غادين بهاد الشي؟
شوفو غير السبليون نهار نزلو شي مغاربة على جزيرة ليلى (اللي هي بالمناسبة كانت ديال المغرب و سمح فيها تاهي) و هي تحيح و صيفطات العسكر ديالها باش يدردكو عليهم، و شوية ما يكون الطايح كثر من النايض لولا تدخل الميريكان اللي بردات خاطر السبليون، مال السبليون ماسمحات فحقها تاهي حيث عارفا راسها ايلا تنازلات غادا تمشي ليها البلاد ديالها.
بغيت غير نعرف علاش احنا منونخين و اشنو اسباب هاد التنونيخ؟
واش هاد التنونيخ راجع لضعفنا التاريخي، يعني بقينا حبيسي الهزائم القديمة اللي عاشها المغرب، و لا لضعفنا السياسي بمعنى معندناش السياسيين في المستوى اللي يحميو هاد البلاد، و لا لضعفنا الديبلوماسي حيث معندناش ديبلوماسيين اللي يدافعوا على المغرب فالمحافل الدولية و يرجعو لو حقو (و ما دافعوا حتى على راسهوم، بحال هاداكشي اللي دارو لوزير الخارجية ديالنا فالمطار ديال فرنسا اللي عراوه باش يقلبوه، خايبة تا فالتعاويد) و لا لضعفنا العسكري مع انه المغرب من الدول اللي مسلحة مزيان و لا ل... و لا ل ....
ايلا بقينا غادين على هاد الحال ديما تنسمحوا فحقنا، شي نهار غادين نلقاو راسنا سمحنا فالصحرا ليبقا لينا منها تاهو و هاد شي ليبقا و لا لا؟.
المصدر: دوك فو
الفيسبوك
اليوتوب
اﻹرسس
تسو- tsū